Умырзая йыя ҡыҙым тауҙа –
Тәүге наҙын йомарт ҡояштың.
Миҙгел генә йәмде алға уҙып,
Миҙгелдәргә китеп аҙаштым...

...Йәй илсеһе — яран гөлдәренән
Таждар йыям туйға, апайға...
Китте апай үҙ юлдары менән,
Ә ярандар һаман туғайҙа.

Нимә тиеп моңлана был кәкүк, —
Йәшәй бирһен, типме ҡаңғыра?..
Мөмкин булһа, йылдар һорама һин,
Йылға торор унан моң һора...

Һай, әҙәмең, тапһа, таба икән
Һанаусыһын килер ғүмерен:
Саҡырыуың менән килгәнмен дә,
Һаҡауланһаң, илтеп күмерһең...